د نیمروز ولایت واټ ټرانسپورټ تنظیم رئیس ملا محمد اقبال کلیم الله په مشرۍ، د اسلامي امارت بېلا بېلو ادارو، د استازو په ګډون د ایران هېواد زاهدان ولایت کې، د دواړو هېوادونو تر منځ، د ټرانسپورټي او ټرانزیټي اړیکو پراختیا په موخه له ایراني چارواکو سره ناسته وشوه. په دغه ناسته کې، د دواړو هېوادونو ترمنځ د ټرانسپورټي وسایطو فعالیت، د مسافرو او سوداګریزو توکو خوندي لېږد را لېږد او په یاده برخه کې د اسانتیاوو برابرولو په اړه بحث وشو.

د ټرانسپورټي او زېربنایي پروژو پلي کولو په دوام سره، دنیمروز ولایت مرکز زرنج ښار، ډاکو سیمه کې، د ۳۵ میلیونه، ۵۰۰ زره افغانیو په ارزښت د تیرپارک جوړولو چارې پیل شوې. دغه پروژه چې په ۶۲۵ جرېبه ځمکه کې پلي کېږي، چارې به یې د یو کال په موده کې بشپړې شي. 

د کندهار ولایت دامان ولسوالۍ کې په ۵۸۲ جرېبه ځمکه، د څه باندې ۵۰۲ میلیونه افغانیو په ارزښت د باروړونکي ترمینل جوړولو چارې پیل شوې. په یاده پروژه کې د ترمینل اصلي ودانۍ، د باروړونکو موټرو لپاره تم‌ځای، سړکونه، د برېښنا او اوبو رسولو شبکې، د ټرانسپورټي شرکتونو لپاره دفترونه د سوداګریزو مالونو ځانګړي مرکزونه، د اوروژنې وسایطو او کارکوونکو لپاره ودانۍ او ځينې نور تاسیسات شامل دي. یاده پروژه چې د عامه او خصوصي مشارکت له لارې پلې کېږي چارې به یې د دریو کلونو په موده کې بشپړې شي.