ټرانسپورټ او هوايي چلند وزیر الحاج ملا محمد فاضل مظلوم په خپل کاري دفتر کې، د یاد وزارت معینانو او یو شمېر رئیسانو په ګډون د مالیې وزیر الحاج ملا محمد ناصر اخوند سره د ټرانسپورټي پروژو پلي کېدو په برخه کې د لا اسانتیاوو رامنځته کولو په موخه ناسته وکړه. په دغه ناسته کې د ټرانسپورټي او خدماتي پروژو پر وخت او په ښه ډول پلي کېدو، د ښاري نظم او د مسافرو د اسانتیاوو لپاره د ټرانسپورټي هډو او ترمینلو پر جوړولو، تنظیم او د دواړو وزارتونو ترمنځ د لا ښې همغږۍ او اسانتیاوو رامنځته کولو په اړه خبرې وشوې.

د کندوز واټ ټرانسپورټ تنظیم رئیس ملا عصمت الله الفت د ټرانسپورټي شرکتونو له استازو سره د ټرانسپورټي چارو طرزالعمل د لا ښه پلي کېدو په موخه ناسته ترسره کړه. په یاده ناسته کې د ټرانسپورټ او هوایي چلند وزارت د طرزالعمل سره سم د ټرانسپورټي چارو تنظیم د مسافرو لپاره د اسانتیاوو زیاتوالي او د ټرانسپورټي خدماتو کیفیت لوړولو په اړه خبرې او د شرکتونو استازو ته لازمې سپارښتنې وشوې.

د ټرانسپورټ او هوايي چلند وزارت د پروژو پلي کولو رئیس فراه ولایت کې د مسافروړونکي او باروړونکي ترمینل، د یاد ولایت شیخ ابوالنصر فراهي بندر باروړونکي ترمینل او د یاد ولایت فراه رود ولسوالۍ کې د تیرپارک پروژو له روانو چارو څخه لیدنه او څارنه وکړه. په دغه څارنه کې د پروژو ترسره شوې چارې وارزول شوې او د یادو پروژو د پاتې چارو د کیفیت او ټاکلي پلان سره سم بشپړېدو په اړه د پروژو پلي کوونکو شرکتونو استازو ته لازمې سپارښتنې وشوې.

د تخار ولایت واټ ټرانسپورټ تنظیم ریاست له‌خوا د تخار–کابل مسافروړونکي ترمینل له لارې د یاد ولایت اوسېدونکو ته په ۲۴ ساعته ډول منظم او معیاري ټرانسپورټي خدمات وړاندې کېږي. په دغه ترمینل کې چې شاوخوا ۲۰ ټرانسپورټي شرکتونه فعالیت لري د ټرانسپورټي اصولو سره سم د مسافرو د لېږد رالېږد چارې پر مخ وړي. په دغه ترمینل کې د ټرانسپورټي چارو غوره تنظیم، شفافیت او وړاندې کېدونکي خدمات هغه څه دي چې د منظم او اغېزمن ټرانسپورټي سیستم څرګندونه کوي او د مسافرو خوندي او پر وخت لېږد رالېږد ته زمینه برابروي.